Nu 21. apreļa da 12. septembram ir izsludynuots Nikodema Rancāna konkurss izcyluokajim Latgolys regiona školuotuojim. Nūslāguma pasuokums itūgod nūtiks Preiļūs 23. septembrī.
N. Rancāna konkursa bolvu ir īdybynuojuse Latgalīšu kulturys bīdreiba (LKB), a konkursa reikuošonu atbolsta realizej LKB sadarbeibā ar Rēzeknis Tehnologeju akademeju (RTA) i Latgolys pošvaļdeibom. Konkursa mierkis ir styprynuot pedagoga profesejis prestižu un atpazeistameibu sabīdreibā, gūdynojūt izcylu veikumu pedagogiskajā darbeibā, latvyskuos un latgaliskuos kulturys tradiceju īaudzynuošonu jaunajā paaudzē.
Konkursam itūgod var pīteikt pedagogus jau pīcuos nominacejuos: 1) par latgalīšu volūdys, kulturys viesturis, nūvodvuiceibys populariziešonu i īvīsšonu vuiceibu voi studeju vidē, 2) par inovativu metodikys lītuojumu apvuiceibys procesā, 3) par myusdīneigu un rodūšu pīeju školānu dorba tykuma audzynuošonai un omotu apvuiceibai, 4) par veiksmeigu pedagoga debeju (na vairuok kai pedagogim ar 3 godu darba stažu). Pīktuo nominaceja ir guojuse kluot piec pošu pedagogu lyuguma – par latvyskuos i latgaliskuos kulturvidis veiduošonu pyrmsškolys izgleiteibys īstuodēs. Vaira informacejis var meklēt konkursa nūlykumā. Aizpiļdeitys dasacejumu anketys ir gaideitys da 12. septembram (ilga.suplinska@gmail.com).
Zynuošonai. Pyrmais konkursa nūslāgums nūtyka RTA, beja 28 nominanti, ūtrais – Ludzys Tautys nomā, konkursa daleibnīku skaits – 15; trešais – Viļānu Kulturys nomā – 30 nominanti nu 11 Latgolys pošvaļdeibu.
Esit atsauceigi i nataupit lobūs vuordus školuotuojim, kas gods nu goda styprynoj Latvejis sabīdreibu i guodoj par jaunuos paaudzis izgleituošonu.
Ilga Šuplinska,
konkursa koordinatore
0
0
0
