Gaidūt Latgalīšu kulturys goda bolvys „Boņuks 2018“ padūšonu, nūskaidruoti bolvys nominanti. Itūgod bolvys par aktivitatem, dorbu i sasnāgumim latgaliskajā kulturā tiks padūtys jau 11. reizi. Ceremonejā tiks paziņuoti 10 bolvys „Boņuks 2018“ sajiemieji i gūdynuots ari bolvys „Par myuža īguļdejumu latgalīšu kulturys atteisteibā“ sajiemiejs. Bolvu padūšonys ceremoneja byus svātdiņ, 24. februarī, 16.00 Latgolys viestnīceibys GORS Lelajā zalā.
Latgalīšu kulturys goda bolva teik taiseita ar mierki apkūpuot lobuokū, spylgtuokū i svareiguokū padareitū i nūtikšonys pārnejā godā latgaliskajā kulturā, gūdynojūt aktivuokūs latgalīšu kulturys puorstuovus, popularizātuojus, kai ari veicynojūt jaunradis i kulturys daudzveideibys atteisteibu iz prīšku. „Boņuks 2018” tiks gūdynuotys tuos personeibys, nūtikšonys i aktivitatis, bez kuru vysa vaira nabyutu īsadūmojama latgaliskuo kultura 2018. godā.
Leidza ar itū godu maineits ari bolvys pretendentu īsnēgšonys i nominantu nūskaidruošonys process, naizdolūt atseviškys nominacejis, bet viertejūt vysa goda padareitū kūpā. Bolvai tika sajimtys 150 dasacejuma anketys kategorejuos „Volūda. Literatura. Publicistika“, „Audio. Video“ i „Aktivitatis. Nūtikšonys. Personeibys“, kūpejais bolvys pretendentu skaits sasnēdze 117 dažaidys nūtikšonys, personeibys, dorbus, projektus i cytys aktivitatis. Kai pretendentu vierteišonys kritereji tyka izvierzeiti gon pretendenta snāguma kvalitate, aktivitate, aktivitate vysa goda laikā, regionā, vaļstī voi plotuokā mārūgā raiseituo rezonaņse, latgaliskums i/voi Latgolys kulturys vierteibu nesšona, pretendenta pamastī pādi – ītekme iz latgaliskuos kulturys procesim iz prīšku.
Latgalīšu kulturys goda bolvys „Boņuks 2018” nominanti ir (alfabeta parādā):
1. 12 TV raidejumu ciklys „Laika leigučuos“
2. Aija Īzāka, „Teksasys latgalīši“ – albums „Dvieselis steigys“
3. Anna Rancāne, kruojums „Prīca i klusiešona“
4. Annele Slišāne – projekts #100dečiLatvijai deči. Izstuodis i gruomota
5. Dokumentaluo kina „Latgalīši Pīterpilī“
6. Dzejnīka i sabīdryskuo darbinīka Ontona Slišāna 70 godu svieteišona Zīmeļlatgolā #OntonamSlišānam70
7. Dzīšmu gruomota bārnim „Zalta puče“
8. Fiļmeņa „Vinnejs Pūks Viļānūs“, Viļānu Muzykys i muokslys školys atbolsta bīdreiba
9. Festivals „Muzykys Skrytuļs 2018“
10. Grupa „BezPVN“
11. Horeografs i XVI Deju svātku virsvadeituojs Ilmārs Dreļs
12. Jaunuo pūdneica i Latvejis stuostnīku asociacejis vaļdis prīšksādātuoja Evija Maļkeviča
13. Kārlis Kazāks. Raidejums „Dzirdi balsis ar Kārli Kazāku“ par Ludzys izlūksni
14. Koncepts „Nameiz“, Jānis Skutelis i „Benji Knewman“
15. Lata Donga – albums „Variācijas“
16. Latgalīšu literaturys populariziešonys akceja „Dūmoj ar komatim“
17. Latgalīšu kulturys aktivists i muzikis Arnis Slobožanins
18. Latgalīšu kulturys ziņu portals lakuga.lv
19. Latgalīšu Reps
20. Latgalīšu volūdys video apvuiceiba „Runuosim latgaliski“
21. Meldrys Gailānis bārnu gruomota latgaliski „Meikuleņš īpazeist omotus“
22. „Mūsdienu mākslas galerija“ Leivuonā
23. Nūvodvuiceibys stuņdis latgaliski – akceja 2018. gada pavasarī
24. Pamatškola „Preiļu Brīvā skola“
25. Projekts „Kārsavas stāsti“
26. Radejis raidejums „Pīci breinumi“ i tuo personeibys
27. Rekonstruātuo Vydsmuižys sīvys tautystārpa autore Iveta Seimanova
28. Saeima par atzeimojamū dīnu nūsoka 27. apreli – Latgolys kongresa dīnu
29. Tautumeitas – albums „Tautumeitas“
30. Vuiceibu leidzeklis „Olūteņš“
Bolvys „Boņuks 2018” žurejis komisejā viertejumus par pretendentim snēdze 35 žurejis komisejis lūcekli – latgaliskuos kulturys puorzynuotuoji, medeju puorstuovi, bolvys reikuotuoju puorstuovi i attīceigūs sferu pīaicynuotī eksperti. Komisejā dorbuojās: muzikis i latgaliskūs projektu vadeituojs Guntis Rasims, tradicionaluos kulturys eksperte Ruta Cibule, komponiste, bolvys puorstuove Ilona Rupaine, literturzynuotneica, Latvejis Republikys Izgleiteibys ministre Ilga Šuplinska, izgleiteibys darbineica Aelita Andrejeva, literate Līga Rundāne, volūdneica Lideja Leikuma, etnomuzikologe Asnate Rancāne, grupys „Galaktika“ daleibnīks Normunds Zušs, režisore Inese Mičule, Latvejis Radejis kora muokslinīcyskais vadeituojs Sigvards Kļava, radejis Pieci.lv personeiba i dīdžejs Toms Grēviņš, režisors Viesturs Kairišs, Latvejis Nacionaluo kulturys centra vadeituoja Signe Pujāte, žurnalists i melomans Kaspars Zavileiskis, dzejneica i žurnaliste Anna Rancāne, portala lakuga.lv redaktore Vineta Vilcāne, Latvejis Radejis Latgolys studejis vadeituoja Renāte Lazdiņa, Latvejis Radejis 2 personeiba Roberts Buivids, Latvejis Televizejis golvonuo satura redaktore Anna Platpīre, Latvejis Radejis Ziņu dīnasta Multimedialuo satura producente Justīne Savitska, latgalīšu kulturvidis aktivists Juris Viļums, uzjiemiejs Valters Murāns, muzykys izdeviejs i dzīšmu autors Guntars Račs, Latgolys planavuošonys regiona puorstuovs Oskars Zugickis, muzikis i uzjiemiejs Jurs Vucāns, bolvys reikuotuoju puorstuove, latgaliskūs projektu vadeituoja Edīte Husare, literats i muzikis Oskars Orlovs, bankys „Citadele“ puorstuove Ligita Magiča, tekstilmuokslineica Annele Slišāne, Latgolys regionaluos televizejis puorstuove Ausma Sprukte, Latgolys žurnala „A12“ redaktore Ināra Groce, žurnaliste i volūdneica Maruta Latkovska, Latvejis Republikys Kulturys ministrejis parlamentaruo sekretare Marika Zeimule i Latgolys viestnīceibys GORS vadeituoja Diāna Zirniņa.
Svineiguo bolvys padūšonys ceremobeja byus ituo goda 24. februarī 16.00 Latgolys viestnīceibys GORS Lelajā zalā. Iz ceremoneju meili gaideiti nominanti, bolvys viertiešonys komiseja, medeju puorstuovi i kotrys latgalīšu kulturys interesents. „Boņuks 2018“ bolvu padūšonu pyrmū reizi vadeis komikis Juoņs Skutelis, bet ar muzykalim prīšknasumim kuplynuos apvīneiba „Latgalīšu Reps“, grupa „Baritoni“, apvīneiba „Teksasys latgalīši“, Arņs Slobožanins, etnografiskais ansamblis „Vabaļis“, „Lata Donga“, folklorys kūpa „Vīteri“, „Misters un Nospiedumi“ i Ūga, kai ari eipašī gosti – grupa „The Sound Poets“.
Pyrma ceremonejis – 12.00 komandys var pīsadaleit pruota spēlēs „Aļberts brauc iz Boņuku“, bet 15.15 paradzāta sasatikšona ar muokslinīku Aigaru Bikši izstuodē „A. Bikšes cīņa ar tukšumu“.
Latgalīšu kulturys goda bolvys „Boņuks 2018“ reikuotuojs ir Latgolys viestnīceiba GORS, tuos nūtikšonu atbolsta Latgolys kulturys programa ar Vaļsts kulturkapitala fonda i AS „Latvijas valsts meži“ atbolstu, Rēzeknis nūvoda dūme, Rēzeknes nūvoda, Dagdys, Kuorsovys, Ciblys i Viļānu nūvodu pošvaļdeibys, bīdreiba „Partitūra“, latgalīšu kulturys ziņu portals lakuga.lv, Latvijas Radio Latgolys studeja i Latgolys radeja. Vaira par bolvu: http://bonuks.lv i http://latgalesgors.lv.
Viesti sagataveja: Edīte Husare
Latgolys viestnīceiba GORS (SIA “Austrumlatvijas koncertzāle”)
Marketinga nūdalis vadeituoja
E-posts: gors.vestis@rezekne.lv; edite.husare@rezekne.lv,
Mob. tel.: +371 29109924
0
0
0
